PILIMON

E Pilimon voh a teß öt ö me eß voh a teß va po vaman manih pa vöon va Kolosi. Eß to kon voh a meh teß vamanih pa teß kikiu akuk peß, a ëhnaneah e Onesimus. E Onesimus to rusin këh voh e Pilimon, pareß nö, ko taum e Pöl po poen neß to teß non pa nohnoh. Eß to vavaato vatëh me non e Pöl, pareß panih en pa taateß peß, ko vaman en pe Ieesuß Kristo.

E Pöl me Onesimus to teß vaßpeh e ne pon. Ivëhkëk, e Pöl to iu non pan, e Onesimus se hah manuh pe Pilimon, ivëh, keß kiun ke na e Pilimon o kiun vëh. Manih po kiun vëh ne Pöl to sosoe ke non na e Pilimon, ko iu non poan se öt hah e Onesimus me o vaeö. Eß hikta iu non pan, e Pilimon se öt hah va in poan manih pa teß kikiu akuk peß, ivëhkëk, eß se öt hah poan vamanih pa meh teß to vaman vaßpeh me non poan pe Ieesuß Kristo.

A ma kiun varih to tataki va ne manih pan,

A potan avih pe Pöl manuh pe Pilimon, 1:1-3E Pöl to soe vavihvih ke Sosoenën, suk e Pilimon, 1:4-7E Pöl to iu non e Pilimon se teß vaeö me non e Onesimus, 1:8-22A soe ataaton pe Pöl, 1:23-25

Philemon

A Teß Kikiu Akuk To Tavus A Teß To Vatet Non A Taateß Pe Ieesuß Kristo

1Eöß e Pöl, to teß noß manih pa iuun nohnoh, suk eöß to vavatvus voh noß a soe vih pe Ieesuß Kristo, me e Timotiß vëh to vaman me non e Ieesuß Kristo to sun vaßpeh me a non neoß pa vanö nös o kiun vëh.

Emöm poß to kiun nös o kiun vëh manem pën Pilimon, eën e vamomhë vih pemöm, na to vatös no sih pa kiu va pa vateeraß e Ieesuß Kristo. 2Me manem pën Apiaß. Emöm to ep va ka nem oah sih manih pe vamenmöm, suk eën to vaman vaßpeh me a no möm sih pe Ieesuß Kristo. Me Arkipus vëh to vavapus vakis non sih pa vatvus vavoasean a Soe Vih pe Ieesuß, vamanih pa teß vëvënsun to vavapus pip non a muhin peß. Me manem pa napan va po vaman to tötönun ne sih pa iuun pën.

3Eöß to hinhin noß pan, e Sosoenën, eß e Tamaara, me e Sunön pea Ieesuß Kristo, ee pon se ururuan a neöm, ko heß a neöm a taateß moomo.

O Iu Me O Vaman Pe Pilimon

4Kea peöß Pilimon, eöß to koman tamoaan rakah noß oah sih, pa ma poen kurus nöß to teß noß pa hin, paröß vavihvih tamoaan rakah ke noß na sih e Sosoenën peöß. 5Suk eöß to pënton voh eoß pa ö nën to iu va nom a napan pe Sosoenën, me o vaman pën manih pe Ieesuß e Sunön. 6O hin peöß to teß va non manih pan, o poen ne eën to vatvus o vaman pën, parën soe ke ro upöm teß, a tah pamëh se heß oah o nat vih kën se nat vavih rakah eom pa ma moeh tah vih, ne ea to kokon no sih pe Kristo. 7Vamomhë vih peöß, o iu vëh nën to heßheß nom sih a napan pe Sosoenën to vavaeö raoe, ka taateß pamëh to vavaeö vörep a neoß ko kupu peöß moomo.

E Pilimon Se Öt Hah E Onesimus Vamanih Pe Kea Peß

8Ivëh, ka manih pe Ieesuß Kristo eöß to antoen e noß pa teß vavoasean, ko taß eoß pën pa nok a tah sën nok. 9Teß kës kov e non peöß to iu noß oah, ko hin varoe a oah. Eöß e Pöl, eöß e vamomhë pën, eöß a siß voe manot to teß noß kuru manih pa nohnoh, suk o vaman peöß manih pe Ieesuß Kristo.

10Ivëh, köß hin oah pa tasun pe Onesimus, pan eën se ururuan eah. Eöß to ep va i noß eah manih pe koaß koman rakah peöß, suk o poen nöß to teß voh noß pa nohnoh, eöß to tavus eoß e tamaneah manih po apen. 11Moaan voh eß to hikta nok voh ka oah ta tah vih. Ivëhkëk, kuru, eß to antoen rakah e non pa nok a kiu, marën a vaßaus a ra poß.

12Eöß to vanö hah eoß nös peß manem pën, eöß to iu rakah noß eah me o kupu peöß. 13Eöß to iu ötöön rakah e noß peß, keß teß me a no neoß, keß se kon a tasun pën pa vaßaus a neoß, pa tëëm nöß to teß noß pa nohnoh, suk eöß to vavatvus voh noß a Soe Vih pe Ieesuß Kristo. 14Ivëhkëk, eöß to hikta iu toon noß oah pa vaßaus a neoß, eöß to iu varoe noß a ö sën nok suk o iu pën. Teß va e non manih peöß to hikta antoen noß a nok ta tah, nën to hikta vapöh kokoman me nom. 15Eß to teß ke non pan, e Onesimus to këh oah pa siß tëëm kökööt akuk, suk ataeah, eën se keh öt hah eah, ko pah öt tamoaan poß e nom peß. 16Ka kuru eß to hikta teß hah va non manih pan, eßeß a teß kikiu akuk, ahik, eß to teß oah e non pa teß kikiu akuk. Eß e kea rakah pën manih pe Ieesuß. Eöß to pah iu vörep e noß peß, paröß nat e noß pën se pah iu vaoah e nom peß, vamanih pa teß kikiu akuk, me manih pa meh teß va po vaman, to teß akuk va kov e non manih pa ö nën to teß va nom.

17Ivëh, kën se keh ep va ka no neoß manih pe vamomhë pën, kamöß hah poß a neah, vamanih pö nën to kamöß va ka neoß. 18Eß se keh nok voh ka oah ta ma pah taateß hat, keß eßeß to teß me non ta ötop manih pën, vahoß maß a ma tah poë varih manih peöß. 19Eöß e Pöl to kiun o kiun vëh pa koren koman neoß. Eöß se piun hah eoß pa ötop pamëh. Ivëhkëk, eën se koe a vanun a ö ne eën to teß me nom a ötop manih peöß po toßtoß voon pën manih po apen, suk eöß to vaßaus voh oah kën tavus a teß pe Ieesuß Kristo. 20Ivëh, köß hinhin a noß oah kea peöß, pan eën se nok ka neoß a tah vaßih, vamanih pa teß to vavatet non e Ieesuß Kristo. Ka manih pa taateß pamëh, eën se vavaeö rakah a neoß ko vavih a koman neoß. 21Eöß to kiun o kiun vëh, ko nat va noß manih pan, eën se nok eom pa tah nöß to hinhin a noß oah, ko nok oah supin eöm.

22A meh tah ivëh pan, vamatop ka neoß ta siß ö kokoroh, peß eöß to vaman noß pan, e Sosoenën se piun en pa ma tah nöm to hinhin nem, ko vaonöt ken peöß pa hah maß peöm.

A Ma Teß To Kiu Vatös Me Ne Pöl To Vanö A Potan Avih Pee Manuh Pe Pilimon

23E Ëpafras vëh to teß me a no neoß pa nohnoh, pa ö nöß to nohnoh noß, suk eß to sosoe tavus non e Ieesuß Kristo, to vanö nös a potan avih peß manem pën Pilimon. 24A ma teß to kiu me a no neoß varih, e re Mak, Aristakus, Demas ke Luk, ee me to vanö nös a potan avih pee manem pën.

25Eöß to hinhin noß pan, o ururuan pe Topoan Ieesuß Kristo se teß vaßpeh tamoaan me a no neöm.